港股大時代，日日千億成交，板塊輪流炒，升到你唔信。究竟今次與往時的大時代比較，誰更扣人心弦？誰更觸目驚心？
經歷股市四次大時代、縱橫股海40年的中潤證券主席蔡陳葆心（蔡太），見盡無數「丁蟹」及「方展博」，成與敗關鍵在於心態及運氣。她建議散戶，應不求做方展博，但求不做丁蟹，不敗心法就是量力而為，切忌博到盡。
蔡太憶述在股災發生之前一年，這個她形容為歷來最「黐線」的時代，「當時中環食晏，人好多，酒樓冇位，但經紀一入去（酒樓），就一定有位，侍應都會問貼士。」
她說：「以前遠東交易所喺華人行，交易場地由玻璃窗隔住，因為個市太旺，電話打唔通，唔少散戶都會敲窗，希望坐近窗的經紀，可以幫手落盤。」這就是逼爆金魚缸年代。
「當年香港天線，我哋叫香港黐線，無資產嘅公司，由1元炒到上30幾元。」當年蔡太亦有幫客戶購入這隻股票，幸好這位客戶贏不少錢，「佢三個幾買，廿幾元走，贏到唔少錢之後買咗兩架車，仲買咗幾隻杯送畀我。」
好景不常，1973年史上第一個股災來臨，恒指由1700多點跌至150幾點。
她認為，在股海中必然存在風險，「唔少大老闆輸到一仆一碌。亦有唔少出市員，到最後成為老闆。」她總結勝負關鍵，成功的，除「本身叻」之外，亦需要運氣；失敗的，運氣不足卻只是其中一個原因，更重要是「睇錯一鋪」及「唔認輸」。
今次大時代，蔡太認為，港股由2008年到現在橫行八年，大跌機會微，大起機會存在，近期大市有回落，但要知道「個市唔會直上直落」。她籲散戶應量力而為，包括金錢、能力及時間，仲要「要輸得起，唔好輸咗之後，仍借錢博到盡」，這樣才可以處於不敗之地。
